அன்பு ஜெயாவின் மரபுப் பாக்கள் - தொகுதி 29

 மரபுப் பாக்கள் -  தொகுதி 29 

85)  பொறுமையைக் கைவிடேல்.

பா வகை: வஞ்சிப் பா (சிந்தடி).

குறைந்தது ஏழடிகள் கொண்ட சிந்தடி வஞ்சிப் பா, ஒரு தனிச்சொல், மூன்றடி ஆசிரியச் சுரிதகம் கொண்ட பாடல்.

சிந்தடியில்: கனிச்சீர் + கனிச்சீர் + கனிச்சீர்.

 

சிந்தடி வஞ்சிப்பா:

அமைதியெங்குமே நிறைந்தேவையம் அன்பொன்றுதான்

நமையாண்டிடும் வலிமையென்னுமோர் நாள்வரட்டுமே!

சுமையாகவே சினமென்பதை துரத்திடுவமே!

எமையென்றுமே பொறுமைமட்டுமே இயக்கட்டுமே!

எந்தவேளையும் குறைகூறுதல் எதிர்த்திடுவமே!

அந்தகாலமே இங்குமலரும் அமைதிமட்டுமே!

தவறென்பதும் சிலவேளையில் தவிர்த்தலில்லையே!

மறந்தேயதைப் பொறுத்தருள்வது மாந்தநெஞ்சமே!

 

தனிச்சொல்:  அதனால்

 

சுரிதகம்:

சினமதை என்றுமே சிறையில் வைத்தே

மனமதைக் காப்போம் மண்ணிலே,

மனத்தினில் அன்பையே மையமாய் வைத்துமே!

 

---------------------------------------

 86) போர்ச்செய் உரிமைக்காக!

பா வகை: வஞ்சிப் பா (சிந்தடி).

பா வகைக்கான் வாய்ப்பாடு:

குறைந்தது ஏழடிகள் கொண்ட சிந்தடி வஞ்சிப் பா, ஒரு தனிச்சொல், மூன்றடி ஆசிரியச் சுரிதகம் கொண்ட பாடல்.

 

சிந்தடி வஞ்சிப்பா:

உரிமையென்பதே ஒவ்வொருவரின் உடன்பிறந்ததே!

உரிமையதுவும் உன்தாயவள் உனக்களித்ததே!

பிறந்தநாளிலே பெற்றவுரிமைப் பெருகவாழ்ந்திடு,

மறவனாகவே உரிமைகாத்திடு மறந்திடாமலே!

வங்கக்கடல் அலைக்குரிமையும் வழங்கலாகுமோ?!

திங்கள்தரும் ஒளிதனதெனத் திரியலாகுமோ?

வாக்களித்திடும் உரிமைதன்னையும் வாங்கிநீயுமே

வாக்களித்திடத் தயங்கினாலுனை வாழ்த்தலாகுமோ?

 

தனிச்சொல்:

எனவே,

 

சுரிதகம்:

உரிமை தன்னையே உதறி விடாமலே

பெரிதாய் அதனைப் பேணுவாய்!

உரிமை, உரிமை, ஒலிப்பாய் ஓங்கியே!

--------------------------------

87)  மனத்தை விரித்துவை.

(குறைந்தது ஏழடிகள் கொண்ட சிந்தடி வஞ்சிப் பா, ஒரு தனிச்சொல், மூன்றடி ஆசிரியச் சுரிதகம் கொண்ட பாடல்.)

பா வகை: வஞ்சிப் பா (சிந்தடி).

 

சிந்தடி:

எல்லோர்க்குமே இடங்கொடுத்திடும் இயற்கையதுவும்

பொல்லாதயிம் மாந்தனுமதைப் போற்றவேண்டுமே!

இல்லாதவர் நிலைகண்டவன் இரங்கவேண்டுமே,

எல்லோர்க்குமே உதவிநல்கிட  இசையவேண்டுமே!

உள்ளவாழ்வுதான் சிலகாலமே, உவந்துநீயுமே

உள்ளமதிலே கனிவுபொங்கிட உதவிநல்கிடு!

மெல்லயாவரும் உலகமதிலே மேன்மைபெற்றுதான்

வல்லமையுடன் ஏற்றம்பெற வாழ்ந்திடுவமே!

 

தனிச்சொல்: அதற்கு

 

சுரிதகம்:

மனத்தை விரித்திடு, மாண்பைப் பெருக்கிடு,

கனவைப் போன்ற காட்சியும்

நனவாய் மாறிடும் நல்லவை பெருகுமே!

----------------------------------------------------------------