அன்பு ஜெயாவின் மரபுப் பாக்கள் - தொகுதி 28

 மரபுப் பாக்கள் -  தொகுதி 28 

82) பெருமை பொருளி(ல்) இல்லை.

 (ஏழடிகள் வஞ்சிப் பா, ஒரு தனிச்சொல், மூன்றடி ஆசிரியச் சுரிதகம் கொண்ட பாடல்.)

பா வகை: வஞ்சிப் பா (குறளடி).

வஞ்சிப்பா:

அருச்செயல்களே ஆற்றிடாமல்

பெருமைதனைநீ பெற்றாளுமோர்

பெருவிருப்பினால் பெருங்காலமும்

தெருவெங்குமே தேடினாலும்

ஒருபயனுமே உனக்கில்லையே!

பெருமையுடனே பெரியோர்களும்

ஒருமித்துதான் உரைத்தார்களே

 

தனிச்சொல்:   உணர்வீர்,

 

ஆசிரியச் சுரிதகம்:

இன்றுநம் உலகில் யாவரும் தேடிடும்

அன்பெனும் உள்ளமே ஆளும்,

என்றும் எங்கும் ஏற்பீர் இதையே!

------------------------------------------------------- 

83 - பேச்சில் இகழ்ச்சித் தவிர்.

பா வகை: வஞ்சிப் பா (குறளடி).

வஞ்சிப்பா:

எப்போதுமே எவ்விடத்திலும்

தப்பாமலே தவறினைத்தவிர்!

உன்நினைவில் உயரெண்ணமே

என்றுமெழவே இயன்றதைச்செய்!

மற்றமாந்தரும் மாண்புடையரே

உற்றயிடமும் உவந்தளித்திடு!

இனம்தனையே இகழ்வோரையும்

மனம்மாற்றவே முயன்றுவென்றிடு!

 

தனிச்சொல்:  என்றும்,

 

ஆசிரியச் சுரிதகம்:

உன்றன் எண்ணம் உயர்வாய் வைத்திரு,

நன்மை பெருகும் நாட்டிலே,

அன்று இன்பம் ஆறாய்ப் பெருகுமே!

--------------------------------------

84) பைய நடந்திடப் பழகு.

பா வகை: வஞ்சிப் பா (குறளடி).

வஞ்சிப்பா

உள்ளபொருளும் உதவினாலுமே

உள்ளகுறையை உணர்ந்துகளைவாய்,

குறையொன்றையும் கூர்ந்துகளைய

நிறைவாயொரு நிலையறிந்திடு,

எப்பொருளிலே ஏற்றமுள்ளதோ

அப்பொருளையே அணைந்தேற்றிடு!

விரைவாகவே வினையாற்றிட

அரைகுறையாய் ஆய்வதைவிடு!

 

தனிச்சொல்:  என்றுமே,

 

ஆசிரியச் சுரிதகம்:

எதுசரி எதுபிழை என்றே ஆய்ந்தபின்

இதுநல் வழிதான் என்று

பொதுவாய் நடந்தால் போற்றிடு வாரே!

---------------------------------------------