தாலாட்டு மழலைக்கு மருந்தாகுமே!

 

தாலாட்டு மழலைக்கு மருந்தாகுமே!

- அன்பு ஜெயா, சிட்னி

(பா வகை: சிஃறாழிசைக் கொச்சகக் கலிப்பா)

 

தரவு:

தன்னுடையத் தாலாட்டே தன்குழவிக் கின்பமென்றுத்

தன்குழந்தை உறங்கிடவே தாயவளும் இசைத்திடுவாள்

இன்பமுடன் குழந்தையுமே இளைப்பாறி உறங்கிடுமே

அன்பிற்குத் தாயிடமே அளவென்ப தில்லைதானே!

 

தனிச்சொல்:

நோக்கிடின்,

 

தாழிசை:

அன்பினிலே உச்சமென்றால் அன்னையவள் அன்பொன்றே

என்றுமிதை மறுப்பாரும் இவ்வையத்தில் இல்லையென்றே

தொன்றுதொட்டு மக்களெல்லாம் தொடர்ந்திங்கே வாழ்ந்தனரே!

 

மற்றவரின் அன்பெல்லாம் மறைவதுமே உண்டுலகில்

பற்றிருக்கும் இன்று,பின் பறந்துமே சென்றுவிடும்

வற்றாத நீரூற்றாய் வளம்தருதல் தாயன்பே!

 

தனிச்சொல்:

எனவே,

 

தாழிசை:

தாய்மரபைப் போற்றிடுவோம் தாலாட்டின் சிறப்பெண்ணித்

தாய்க்குழுமம் வணங்கிடுவோம் தாய்மனங்கள் குளிர்ந்தாலே

தாய்நாட்டில் நற்செயல்கள் தழைத்திங்கே பெருகிடுமே!

 

தனிச்சொல்:

நோக்கிடின்,

 

சுரிதகம்: (ஆசிரியப்பா)

அன்னையின் அன்பும் ஆழமாய்ப் பாய்ந்துமே

அன்னையின் தாலாட் டணைக்கும் குழவியை

என்றுமே அன்னையின் அன்புமே காத்திடும்

நன்றாய் வளர்த்திட நாளுமே உழைத்திடும்

அன்னையின் அறிவுரை அணைத்துமே வளர்த்திடும்

அன்னையே இறையென அவர்களும்

என்றுமே வாழ்ந்திடின் ஏற்றமும் அடைவரே!

------------------------ 

இரக்கம் கொள்வீர்!

 

இரக்கம் கொள்வீர்!

– அன்பு ஜெயா, சிட்னி

(பா வகை: ஆசிரியத் துறை)

 

இரக்கம் என்பதே எல்லோர் மனத்திலும்

பரந்தே இருந்தால் பாரினில் என்றுமே

இரந்து வாழ்பவர் இருப்பரோ

இரக்கமே கொள்வீர் இன்னலை நீக்கவே!

 

துன்பம் எவரையும் துவளச் செய்தால்

அன்புடன் அவர்க்கும் அளித்திடே உதவி

என்றும் வாழ்வோர் எல்லாம்

இன்பமாய் இருந்திட ஏற்றவை செய்திடு!

 

இருப்பதில் பகுதியை இரப்போர்க் கீதல்

இருத்தும் உன்னை இறையின் அருகில்

பெருகிடும் நல்வினைப் பேறுமே

நெருங்கிடும் அமைதியே நெஞ்சினில் நிறுத்திடு!

----------------------------