மரபுப் பாக்கள் - தொகுதி 20
58) துயர்விரட்டத் துணிக.
பா வகை: கழி நெடிலடி ஆசிரிய பதினொன்றாம் சீர் மண்டிலம்.
பா வகைக்கான வாய்பாடு:
ஈரடிப்பா –
ஓரடியில்:
காய்+காய்+காய்+காய்
காய்+காய்+மா – தனிச்சொல்
காய்+காய்+மா.
இரண்டாம் வரியிலும், மூன்றாம் வரியிலும் ஈற்றுச் சீர் சந்த
ஓசையில் அமைதல் வேண்டும்.
ஓரடியின் மூன்று வரிகளின் முதல் சீரில்
அதாவது 1,5, 9 ஆகிய சீர்களில்
பொழிப்பு மோனை அமைதல் வேண்டும்.
இரண்டடிக்கும் ஓர் எதுகை அமைதல்
வேண்டும்.
-----------
வாழ்க்கைதனின் ஓட்டமதில் வளமதுவும் வந்துபோகும்,
வழக்கமிதை உணர்ந்துநீயும்
வாழ்வாய் – அன்றேல்
வளம்குன்றி வாழ்வினிலே
தாழ்வாய்!
தாழ்ந்தவரும் வாழ்விலோர்நாள் தன்னிறைவும் பெறுவர்தான்,
தவறாமல் அதற்கெனவே
உழைப்பாய் – அந்நாள்
தகுதியுள்ள வாழ்வுபெற்றே
தழைப்பாய்! (1)
வாழ்க்கையதோ பேரலையில் தடுமாறும் ஓடம்போல்
வழியொன்றும் தெரியாமல்
நோக்கும் – துணிவே
வழியொன்றைக் கண்டெடுத்துக்
காக்கும்!
தாழ்வான இடம்நோக்கிப் பாயுமந்த ஆறுபோல
தத்தளிக்கும் உன்னையுமே காக்கும் – மாந்தம்
தளிர்விட்டே வாழ்வுதனை
நோக்கும்! (2)
--------------------------------------
59) தூற்றி வாழாதே.
பா வகை: கழி நெடிலடி ஆசிரிய
பதினொன்றாம் சீர் மண்டிலம்.
ஆற்றலில்லா மாந்தருமே ஆற்றல்தான்
பெற்றிடவே
அன்புடனே முயன்றிடுதல் ஏற்பீர் – அன்றேல்
அவர்களையும் குறைகூறல் தவிர்ப்பீர்!
ஏற்றமுடன் எல்லோரும் வாழ்ந்திடவே
மாந்தரெல்லாம்
இயன்றதொருப் பங்கினையே தாரும் – வையம்
எல்லோர்க்கும் இன்பமென மாறும்!
(1)
ஏற்றமது கண்டிடவே முயல்பவரின்
உழைப்பிற்கே
இயன்றவரை உதவிதன்னைச் செய்வீர் – அன்றேல்
ஏளனமாய்ப் பேசுவதைத் தவிர்ப்பீர்!
போற்றவொரு மனமிருந்தால் போற்றுங்கள்
முயற்சியினைப்
போரிட்டுத் தோற்றோரின் பெருமை – அதுவே
போரிட்டோர் மீண்டெழுப்பும் திறமை!
(2)
------------------------------------------
